یوروش مهرعلی بگلی جینابلاری نین یئنیلمز اینامینا سونولور

واله یوردسئور

81 اینجی ایلده یوکسک اوخولدا اولان زامان، آذربایجان میللی حرکتینه گؤره قارداشیمندان یئنی بیر سوزلر ائشیتدیم. او چاغلار قارداشیم بیلیم یوردا تحصیل آلیردی و تحصیل آلماق قیراغیندا آیدین دوشونجه اینسانلارلا تانیش اولماغلا میللی سورونولاریمیزلا تانیش اولموشودو. بیزلر  باشدا اؤزوموز میللی سورونو آنلاییریق سونرا اونو آیری یاخینلاریمیزلا پایلاشیریق. بو اساسدا  قارداشیم یا داحا دوغروسو قارداشلاریم منی میللی دوشنجه ایله تانیش ائلمیشدیلر. قارداشیم بیلیم یوردلاریندا کئچن احوالاتدان دانیشیردی، چیخان و یاییلان درگیلردن من اوچون گتیریردی. قوپوز درگیسی هئچ زامان خاطیریمنان سیلینمز. قارداشیم میللی حاقلاریمیز اوغورندا چالیشلانلاردان آد آپاراردی، چوخ آدلار. آنجاق بیر آد وارییدی، قارداشیم اونو آغزینا گتیرنده دوغوردان آیری بیر دویغو گئچیریردی. یوروش و تمام. 2 ایلیم قالیردی یوکسک اوخولو قورتارام و بو ایکی ایل منه بیر عؤمور  کیمی اوزانیردی. ایستیردیم بو ایکی ایلی قورتارام و بیلیم یوردا یوروش کیمی اینسالارلا تانیش اولام و آذربایجان اوغورندا چالیشام. اونون یازیلارین اوخودوی کن و اونون چالیشمالارین قارداشیمنان ائشیدیرکن اؤز اؤزمه دئییردیم یانی اولا بیلر بیر گون من بو اینسانی یاخیندان گؤرم. اولا بیلر بیر گون منده اونون کیمی آذربایجانا چالیشام، اویادام و یازام.

83 اونجو ایلده منیم دیلکلریمین بیر چوخو گرچکه چئوریلدی. من یوکسک اوخولو بیتیردیم و بیلیم یوردا کئچدیم. بیلیم یورددا آذربایجان اوغروندا چالیشان اؤیرنجیلرله تانیش اولدوم و اونلارنان بیرلیکده آیری اؤیرنجیلرله میللی سورنوموزا گؤره دانیشماغا و اویادماغا باشلادیق. آنجاق منیم حوسیم یوروش بگی گؤرمیه گئت گئده چوخالیردی. گؤیلوم ایستیردی دوشونجه مه گؤره و چالیشماغا گؤره یوروش ایله دانیشام. ایستیردیم سوروشام "بی نئنملییک". بیر گون یاتاقدا اولار کن ائلدار گلدی و دئدی یوروشو گئنه توتوبلار. بو سؤزو ائشیدنده ایکی سورو بئینیمه گلدی. نیه توتولماغی بیرینجی سورو ایدی و ایکینجی سی "گئنه" سوزونده وارییدی. بیر آدام بیر دؤنه، ایکی دؤنه توتولماغنان گئنه توتولان اولا بیلمز. آنلادیم کی ایطیلاعات مامورلاریدا بیزیم یوروش بگی بیزجت سئویرلر و  نئچه آیدان بیر قوناق چاغیریرلار. اونان سونرا بو گئنه لری چوخ ائشیتدیم. 84، 85، 86 ده و سون دؤنه 89 دا، داحا دوغروسو بیر نئچه گون بوندان اؤنجه. اساسا ایطیلاعات مامورلاری یوروشه اوخشار اینسانلاری چوخ سئورلر. مثل ایچین سعید متین پورو 8 ایل اوز یانلاریندا ساخلیاجاغلار. حتما اولار بو بگلری چوخ سئویرلر. بیز گرک پاخیل اولمایاق. اینانیرام کی یوروشلر، سعیدلر، عباس لیسانیلر، ساوالانلار، مهدی لر و یوزلرله بئله اینسانلار، ایطیلاعات مامورلاریندا سوندا اویاداجاقلار.

84 ده آخیر من بگی گوره بیلدیم. ائلدار بیر گون گلدی یاتاغا بیر خوش خبرله. دئدی اوشاقلار یوروش گئجه گلجک بیرا. دوغوردان چوخ سئویندیم. او چاغاجان بؤیوک اینسالریمیزدان بیر چوخون یاخیننان گؤرموشدوم آنجاق یوروش چئشیتلییدی. 2 ایلییدی اونو گؤرمک دیلگیم ایدی. میللی دوشونجه نی اونون یازیلاریننان و واسیطه سی ایله قارداشیمین آغزینان،  اونون سوزلریندن آلمیشدیم. هئچ زامان یادیمدان چیخماز او گئجه من دومانلی تبریزین 3 اونجو جیلدین اوخویوردوم و اونو اوخویورکن بی اوتاغا گیریدی. الدار بیزلری بی ایله تانیش ائله دی. من چالیشیردیم یالنیز قولاق آسام. قورخوردوم او گئنه لردن بیری قاباغا گله و بگی بیر نئچه زامان تاپا بیلمیک.

او گئجه گؤردویوم یوروشه گؤره بیر سوز دیه بیلدیم. یوروش یانی یوروش. یوروش بیر لئشگر کیمی یوروش ائلمیشدی شوونیزمین جانینا. دانیشدیغجا، دانیشیغلارین جانیما آلیردیم. بیر نئچه سورولاریم وارییدی، اولاری سورشدوم. اساسی بیر سوروم وارییدی. ایستیردیم بیلم نئچه اینسانلاردا میللی مسئلیه گؤره دغدغه یاراتماق اولار. گوزل بیر جاواب وئردی. دئدی بیز بیر شئی یاراتمیریق، اولان دورمو توصیف ائلئییریک. دئدی اولان دورومو آذربایجان میلتینه گرک آچیقلایاق. چوخ اوزون بیر گئجه ایدی او گئجه. منیم تختیمین اوستونده دومانلی تبریزی گؤردو. دئدی اونلاری راهنمایی اوخولوندا اولارکن آلیب و اوخویوب، سونرا دا وئریب ائلدارا. بیر ساده حیساب کیتاب ائله دیم گؤردوم یوروش اؤز تای توشلارینان 20 ایل و بیزلردن 30 ایل قاباخ دیر.

آمریکانین عراقا هجوم ائتمییندن بیر ایکی آی کئچیردی. یوروش بیزدن سوروشدو باخیشیز ایران و آمریکا ایلگیسینه ندیر. بیزیم باخیشلار چوخ اؤنملی دییردی آنجاق بی ایران و آمریکا قوت نکته لرین سایلادی و گؤزللیکله گلجه یی گؤردو. آنامینان جانینا آند ایچه بیلرم بو گونه قدر نه دئییبدی دوغرویا چئوریلیب. دوغوردان دا بیزلردن 20، 30 ایل قاباغییدی.

گئچن هفته ائشیدیم گئنه یوروشو توتوبلار. بو دؤنه هئچ سورو بئینیمده یارانمادی. بیلیردیم یوروشو نیه توتوبلار. آنجاق اؤز یانیمدا دوشونرکن اؤزومه دئدیم اولا بیلر یوروشو توتالار، نئچه آیلاردا ساخلیالار، نئجه کی سعیدی ساخلاییبلار، لیسانی جنابلارین ساخلادیلار آنجاق اولارین دوشونجه سی هئچ زامان توتولا بیلمز. اؤزومه دئدیم اولا بیلر گئنه یوروشو توتالار، نئجه کی ساوالانی گئنه توتموشدولار، نجه کی یوزلرین گئنه توتموشدولار آنجاق میللی حرکتی هئچ زامان توتا بیلمزلر.

http://yurush.blogsky.com/1389/02/27/post-3/