Şah Abbas Safəvi dövlətinə 1587-1629-cu illərdə hökmranlıq etdi və öz imperiyasını dünya güclərindən birinə çevirən padşah kimi ad qazandı. Müharibələr apararaq o İran ərazilərini bir imperiyada birləşdirdi və onun dini islahatları şiə islamını dövlət dininə çevirdi.


Sərgidə İranın dövlət muzeyindən gətirilmiş əşyalar nümayiş olunur. Bu eksponatların çoxu əvvəllər İrandan xaricdə göstərilməyib. Qızıl sapla toxunmuş xalçalar, zərif əlyazma şəkilləri və keramikaların dəbdəbəsindən başqa, sərginin verdiyi zövq bir də tarixlə bu gün arasındakı ironik oxşarlıqlardır.

Abbas öz ailəsinə qarşı dəhşətli qəddarlıq edərdi, oğlanlarını öldürməklə və ya kor etməklə cəzalandırardı. Amma eyni zamanda o, bir dindar idi, yüzlərlə kilometr payi-piyada yol gedib, ziyarətgahlara baş çəkərdi, müqəddəs yerlərdə möhtəşəm məscidlər tikdirərdi.

Kurator Şeyla Kanbi deyir ki, Şah Abbasın hökmranlığı və ipək ticarətindən imperiyasını maliyyə baxımından qorumaq üçün istifadə etməsi bu günlə də səsləşən faktdır:

“Fakt odur ki, İranda bu gün bütün dünyanın istədiyi bir xammal var. Bugün bu məhsul neftdir, Şah Abbasın zamanında isə dəbdəbəli tekstil idi, və o, neftdən daha gözəl idi.”