"Türkiyə erməni, kürd və türk xalqlarından üzr istəməlidir"

Türkiyə Barış və Demokratiya Partiyasının (BDP) Bitlisdən olan millət vəkili Nəzir Karabaş partiyasının Dənizli Konqresində dövlətin əleyhinə ağır ittihamlarla çıxış edib. O, Türkiyənin 1915-ci ildə erməniləri soyqırıma məruz qoyduğunu iddia edərək “dövlətin erməni, kürd və türk xalqlarına üzr borcu var” ifadəsini işlədib.

SANAnın QAYNARdan aldığı xəbərə gorə Konqresdə çıxışına kürdcə başlayıb türkcə davam etdirən millət vəkili bildirib ki, Türkiyə həqiqətləri öz içində müzakirə edib qiymətləndirməlidir: “Ermənilər və bir çox tarixçilər 1,5 milyon erməninin soyqırıma məruz qaldığını deyir, Türkiyə isə rəsmi şəkildə həmin illərdə ölən erməni sayını 300-500 minlə ifadə edir. Rəqəmlər əhəmiyyətli deyil. Ermənilər qadın, qoca, uşaq deyilmədən yurdlarından qovuldu. Bir çoxları isə mallarını qarət edən müxtəlif təşkilatlar tərəfindən öldürüldü. Türkiyə bu gerçəkləri öz içində müzakirə edərək qiymətləndirmək, dünyanın bir çox müasir ölkəsinin etdiyi kimi, bu gerçəkləri gün işığına çıxarıb üzr istəmək əvəzinə, hadisədən imtina edir. Türkiyə üç xalqdan üzr istəməlidir. Erməni xalqından, o qırğını yaşatdığı üçün, kürd xalqından, bəzi günahlara ortaq etdiyi üçün, türk xalqından da 90 ildir gerçəklərdən üz döndərdiyi üçün”.

Məktəbdə və ya həyatın hər sahəsində uşaqların ən çox təzyiqə məruz qaldığı ölkənin Türkiyə olduğunu deyən millət vəkili Türkiyənin nə köhnə Türkiyə, nə də kürdlərin əvvəlki kürdlər olmadığını diqqətə çatdırıb.