ايلك دفه اونو تبريز اونيوئرسيته سينده كي اوچ گونلوك تحصونلرده تانيديم. بير اوجا، هئيكللي و سرت باخيشلي گنج اوْغلان ايدي، دوْلقون و قورخماز گؤزوكوردو. هامي يا روحيه وئريردي، حراستله دانيشيردي، موشكولو اولان اوشاقلارين سؤزلرينه قولاق وئريردي، تيلفونلا خبرلشيردي، دوستلارلا ميرتلاشيردي. هئچ ائله بير بو تحصون، اوْ و نئچه باشقالاري آدينا قورتولاجاغيني اونوتموشدو. منه تاي صفر كيلومترلر ده هردن بير تحصونو ايلنجه ايله ترسه ساليرديلار، البته سوْنرالاردا بيلديم كي بيرپارا آزدان-چوخدان نئچه كيلومتر ايشله ميش دوستلار دا تحصونو ايلنجه كي هئچ، قوناق باجي ايله تاخ وورورموشلار! قيافه سي تانيش گليردي، احتيمالاً رحمتليك سهند درنه يينده بيله سيني گؤرموشدوم (اوْ زامان هله رحمتليك اولماميشدي). گؤزوم اوندا اولدوغوندايكن، بيردن بيزه ساري گليب دئدي: نادير، ياريم ساهاتا بوراخيلير، روحيه نيزي ساخلايين! ياريم ساهات گئچيب قورتولدو، 15 گون سونرا نادير-ي بوراخديلار! آما آديني بيلميرديم، يانيمداكيندان بو كيمدير دئيه، سوْروشدوم ... :«آيدين خوْجالي».

حقوق اؤيرنجيسي ایدي. اونيوئرسيته ده سياستله هر چييين چييينه سورتن بيله سيني تانيردي. هامي بو كيشي نين اخلاقي، معرفتي، شهامتي و ساواديندان دئيردي. سؤزون دوزو هئچ زامان اوندان بير پيس زاد ائشيتمه ديم. قولاغي توكلولر قويماديلار آرتيق تاني يام بيله سيني. ائله اوزوموزه گلن يايدا، 17 نفره حوكم ووردولار. آيدين دا 2 تئرم تعليق، بيري قطعي بيري ده معلق يئدي. يازيق بيلميردي بو يايدان سوْنراكي يايلاري سلوللارلا دوستاقلاردا گئچيرده جك. دئمه اونون يايلاري بيزيمكيلره تاي دئييلميش! او ياي گئچدي. گلن تئرم تعليقلي اولماسينا گؤره آز گليردي اونيوئرسيته يه. نئچه دفه بيله سيني بوفه ده زاددا گؤردوم. مني ائله تانيماديغي حالدا، ياخجي بيله مي تحويل آلاردي. ائله روحيه لي ايدي كي من منليييمده اؤز قوْرخاقليغيم و درده ديمزليييمدن اوتانيرديم، به بيزلر ده آخي او تحصونده وار ايديق، اوْردويا گئتمه ميشديك كي! او تئرمده، قولاغي توكلولر، سهند درنه ييني ده تاريخه قوووشدوردولار! بو دا بير ضربه؛ قشنگ ده يئييرديك، جينقيريميز دا چيخميردي، ائله بير تره ييميزين اييي گؤيه قالخميشدي.

گلن تئرم اوْ و اوْبيري حوكم يئينلر قاييتديلار. چوخونو دا او زامان تانيديم. آدامين گؤز ايشيقلاري گونده گؤزونون قاباغيندايكن، آنجاق آيدين كيمي «به يلر»ي گؤرمه يه حسرت چكملي ايدين. او تئرمين امتحانلاريني دا وئرندن سونراكي گونلر ايدي كه اينترنتده گزيركن: «...مهر، آيدين خواجه اي و فراز...» ! په هوووو ! به نييه آخي؟ بئله اولدو كي آيريلاري يلا برابر اولدوق آيدينلا دوستلاري نين «آغلايانلاري» ! آغلاماق نه دئمكدير، قالسين!

... مئهر آيي نين سوْنلاري ايدي. تبريز مركزي دوستاغي نين قاباغيندا توْپلانميشديق. هامي گولوشوردو. عاييله لر ده گلميشديلر. سيگارلاشيرديق كي بيرينجي دوستوموز بوراخيلدي. ائله بيربه بير چيخديلار. آيدين بوغ قويموشدو، توركيه نين اسكي سينما اوْيونچو لارينا بنزه ميشدي! هاميسي ايله گؤروشوب اؤپوشدوك. كاسيب اوشاغي كيمي بيرليكده عكس ساليرديق كي بير آتيشما باشلاندي. دوستاق آژيري سسلندي. قاپيسي آچيليب گؤز ايشله يينجه سرباز ائشييه تؤكولدو. اللرينه گئچني توتوب دوستاغين ايچينه آپاريرديلار. هله نه لر اولدو قالسين، سونرالار دا ياديميزا دوشنده گولمكدن قيريليرديق. بو هايا هايدا، بيز ده دورومو «كؤتو» گؤردويوموزده،  دور دابانا قاچديق، هئچ بيلمه ديك ده نئجه قاچديق!

باشقالاري ايله ايشيم يوخ، آيديني سينديرابيلمه ميشديلر. هئچ ائله بير نئچه آي سلولدا جان چوروتمه ميشدي. بيرآز دا لاپ روحيه لنميشدي. آما باخيشلاري نين درينلييينده بير حوزون گؤرونوردو؛ منه تايلارين ياواليغيندان قايناقلانيرميش بلكه، يوخسا من تانيديغيم آيدين، ائله دييي ايشلره يوخ «ائله مه دييي» ايشلره پئشمان اولابيلردي. اعتراف ائله ملي يم: بيله سينه گيجيييم گليردي. منجه چوخ يوخ، اوْن نفر آيدينا تاييميز اولسايدي، ايشي چوخدان يئرينه قويموشدوق ... ووردو محكمه حوكملري گلدي. آيدينلا باشقا حوكم يئينلر، بو يايي دا دوستاغا مشرف اولدولار. تشرفدن بير-ايكي ساهات قاباق گؤردوم بيله سيني. سانكي توْيا گئديردي. دا اوردا قاباغيندا اسگيك گتيرديم! بو كيم ايميش !؟!

قاباقجالار كيمي، يايلا ايكي آي پاييزدان قورتولدو، آيدين چيخدي، گؤزلريميز آيدين! دا آيدين بيزيمكي ايدي. قولاغي توكلولر او تئرمي قويماديلار واحيد گؤتورسون، گلن تئرم ده 7 واحيددن چوخ وئرمه ديلر بيله سينه. گؤز آلتيندا اولدوغوندان آسيلي آز گؤروشه بيليرديك. آما دئمه آيدينسيز گئچن يايلار قورتولماق بيلمير. بو يايي دا آيدينسيز قالساق دا، آرتيق آيدين يوْلوموز بللنيبدير. آيدينلاري توتوقلاماقلا، شهيد ائتمكله، سورگون سالماقلا، ساده جه قولاغي توكلولرين عؤمور چيراقلاري نين ياغ توكتمه سي تئزليييه دوشور. بونو يازيركن آيدينين نه حالدا اولدوغونو بيلميرم، آما ياخجي بيليرم كي اينامي گوندن گونه آرتيب منه تاي آراليقدا اويناقلايانلاري اوزدن آپارير. نه قدر نارين اولدوغوموزو بيله ميزه خاطيرلاديب شيرين يوخولاردان اويادير بيزي. اومورام بيله سينه گؤره ائتديييم اسيرگه ييشلرله قصورلاري، نارينليغيما گؤره باغيشلاسين. گركدييي قدر، آيدينين يانيندا اولماديغيمي دا آيدينجاسينا بيليرم. آيدين ساوالان داغينين اينسانليغيدير؛ ساوالان دومانسيزلاميشسا دا باشينا قار اولماغيميز لازيم ... گؤزلريم دوْلدو!

دوْلدوردوغونوز و اوزدن آپاردیغینیز سلوللار، حلالينيز اولسون به يلريم !